Revelation of John 22
Afa'a ne'maiya ya'mo alino ne'apamiya ani'e yosa'efe'mo anava gemo hu'niya gemae
1Inagi enisole vekamo'a afa'a ne'maiya ya'mo alino ne'apamiya ani'mo alopa ani'mo uno nelamiya ani'mo'a aeno lata late'age'mo nehiya ani'mo alino nave li'niye. Ani ani'mo Goti'a yagaino ne'apateya sia'afati'e aikeli sipisipimo'a yagaino ne'apateya sia'afati'e'mo emineno alopa ka'mo taoni folagapi'mo hane'niya kate'mo lami'niye. Nelamiya ani'mo aluga aluga ani agi'nale'mo afa'a ne'maiya ya'mo alino ne'apamiya yosamo hanege hanege huno hane'neno magoke kafugafi'mo tuolofu'a afina'mo muki kai'a'e kai'a'e'mo alagamo ne'ae. Yosa haita'amo'mo alu kotega alu kotegamo mai'naya vaya'mo alino hapageno apatesiyafe'mo hane'niye. 3Goti'a mago hosu yafe'mo ohau'nisiya ya'mo alagi ohanegaiye. Goti'a yagaino ne'apateya sia'a'e aikeli sipisipimo'a yagaino ne'apateya sia'a'e'mo taonifi'mo hane'nisige'apae'mo Goti ali'ya'amo ne'aliya vaya'amogimo Gotife'mo mono hugae. 4Apakaemo Goti augosafi'mo ne'agesageno'ae'mo agi'amo hapanile'mo avo'mo kaegaiye. 5Halate mago'e huno hani osugiye. Ala kava ne'mo Goti'a ha le ya'mo alino apamigiya'mofe'mo lamumo'mo aeno ha neleya ya'mo alagi ohanegaiye. Apakaemo yagaime yagaime u'a yagai'a hano osu'a maigae.6Inagi enisole vekamo'a, Mani geleti'mo apakesa afi'a fatago hisaya gemo lama gemo hane'niye. Ala kava ne'mo Goti'a agaetegati gemo alini e'a ae'a hakalo hu'a hapa nepaiya apaote vaya'amogimo ge'amo hapa paisayafe'mo enisole veka'amo alino ate'nigeno emine'niye. Goti'a ali'ya'amo ne'aliya vaya'amogimo malage huno afole aisiya kava'mo alino apave lisiyafe'mo alino ate'nigeno emine'niye, huno naha pai'niye. 7Afiyo, Aise afina'mo utesige'na emi'negauve. Mani mukufi'mo avo'mo kae male'niya gemo aune gemo akame nehaya vaya'mo Goti aulagale'mo alagepa hu'a mai'nayanage'a afa'a apamogaga aigae, huno hu'niye.
8Nagaemo Yoni'namo ani gemo afite'nae'mo ani kava'mo age'nove. Afige agege hute'nae'mo agaefe'mo mono hisuvafe'mo alino nave li'niya enisole vekamo aiyafi'mo nago'ya fai'na asagau'na ai'nova'monanafa 9agaemo, afa'a ato. Nagaemo kagae'e'mo ali'ya'amo ne'alu'a veka'ala'mo mai'no'ae. Nagaemo konagakamogimogi Gotitegati gemo alini e'a ae'a hakalo hu'a hapa nepaiya vayanagi muki vaya'mogimo mani mukufi'mo hane'niya gemo afite'a akame nehaya vayanagi hu'na apafalu'apimo'namo mai'nova'mofe'mo ali'ya'amo ne'aluna vaya'mo mai'none. Gotifeke'mo mono huvo. 10Ago afole aisiya afina'mo hogo nehiya'mofe'mo mani gemo mukufi'mo avo'mo kae male'nana gemo aeka ati okaege'apao agegayanagi. 11Hosu kava'mo nehaya vaya'mo afa'a apatale'nege'apao ani hosu kava'mo mago'e hu'a hu'a maiyo. O'ani'ya kava'mo nehaya vaya'mo afa'a apatale'nege'apao ani o'ani'ya kava'mo mago'e hu'a hu'a maiyo. Alagepa kava'mo nehaya vaya'mo afa'a apatale'nege'apao ani alagepa kava'mo mago'e hu'a hu'a maiyo. Apaote kava'mo nehaya vaya'mo afa'a apatale'nege'apao ani apaote kava'mo mago'e hu'a hu'a maiyo, huno naha pai'niye.
12Afiyo, aise afina'mo utesige'na emi'negauve. Nagaemo miya'apimo alini'na emi'ne'na muki vaya'amogimo hu'naya kava'apilefe'mo ali'na apamiguve. 13Nagaemo ali'na aepa fai male'novanage'na ali'na hano hu'na atesuva vekamo mai'nove. Hogote'na mai'ne'na hemeni'e'mo ne'mauvanage'na henaga'a'e'mo alagi maisuva vekamo mai'nove. Ali'na aepa fai'na ne'atova vekamo mai'ne'nae'mo ali'na hano hu'na ne'atova vekamo mai'nove. 14Goti'a ma kava hiyo, ina kava osiyo, huno hu'niya gemo akame nehaya vaya'mogimo Goti aulagale'mo alagepa hu'a mai'nayanage'a afa'a apamogaga aite'a taoni lafi kateti'mo kipapi'mo fale'a hai'a afa'a ne'maiya ya'mo alino ne'apamiya yosa alagamo negae. 15Negaya'monanafa kalagana vayanagi Satani himamu'aleti'mo no'agaya aeto agufa aune kava'mo nehaya vayanagi kumai kava'mo nehaya vayanagi vaya'mo ne'apamagiya vayanagi aigofe goti'apimogife'mo mono nehaya vayanagi muki vaya'mogimo aigofe kavafe'mo hapau'nige'apae'mo aigofe gemo nehaya vayanagi hu'a ani taonimo malagamo maigae.
16Nagaemo Yesu'namo siosi'afi siosi'afi'mo mai'naya vaya'aife'mo mani gemo hapa paisiyafe'mo enisole veka'nimo ali'na ate'nogeno emine'niye. Nagaemo Nevini hafu'ya'agana hu'na maige aginago'amo maige hu'na mai'ne'na netepi'mo lusi kava huno aeno ha neleya kanefikana hu'na mai'nove, hu'na ha pai'nogeno hapa pai'niye. 17Goti Auneme'amo'e sipisipi vekale'mo maisiya a kanomo'e'mo, Ne'eyo, hu'ana neha'ae. Ani gemo afi'nisaya vaya'mogimo, ne'eyo, hu'a hiyo. Anife'mo lapau'nisiya vaya'mogimo ne'eyo, hu'a nehae. Hapau'nisiya vaya'mogimo afa'a ne'maiya ya'mo alino ne'apamiya ani'mo fiku ali'a negae, huno hapa pai'niye.
18Nagaemo Yesu'namo muki vaya'mogi mani mukufati'mo aune gemo ne'afiya vaya'aife'mo, ehetapiye, hu'na lokiya gemo nehuve. Mago vaya'amogimo mani ge'e mago alu ge'e'mo ali'a magokepi lokae'a malesageno'ae'mo Goti'a mani mukufi'mo ago ava gemo hu'niya agufa kayoteti'mo apamagigiye. 19Mago vaya'amogimo mani mukufati'mo mago gemo ali'a atale'nisageno'ae'mo Goti'a hetama'apimo alino atalesige'a aote taonifi'mo hai'a o'mai'a afa'a ne'maiya ya'mo alino ne'apamiya yosa alagamo o'negae. Ani taoni'e yosa'efe'mo anava gemo mani mukufi'mo hane'niye. 20Ani kavafe'mo ava gemo hu'na hapa nepauva vekamo'namo, He, hu'na, aise afina'mo utesige'na emi'negauve, hu'na hapa pai'nove, huno hapa pai'nige'a, He, lama ge. Ala kava ne'mo Yesugamo emikeno, hu'a ha pai'nae.
21Ala kava netimo Yesu'a muki'amogitapamo fiku lapa maeno lapamino. He lama ge.
Copyright information for
KYG